Nə siqaret keçirər nə içki yoxluğunu

Əllərimi cibimdən çıxarmıram nə vaxtdı

Üşümürəm eləcə vərdiş etmişəm buna

Əlimi unutmuşam... elə bilirəm yoxdu.

·

Bir qəribə boşluğa yuvarlanıb gedirəm

Nə tutmağa yerim var ,nə də tutmaq həvəsim

Elə bilirəm indi elə lap bu dəqiqə

Bitəcək ömür vaxtım kəsiləcək nəfəsim

·

Nə bilim.. evdə yoxam, küçələr də ögeydi

Bu şəhəri unutsam səni unudacağam

Heç vaxt qatar keçməyən, heç kimi gözləməyən

Həmin o köhnə kürüş tənha dayanacağam

·

Qovur Bakı küləyi başımdan xatirəni

Saçlarımı dolayır yenə fikirlərimə

Bu Fələyin saydığı nədisə düz gəlmədi

Sənin dualarına, mənim zikirlərimə

·

Baxdım əlim üzümdə son çəkdiyim şəklinə

Ayrılığı axtardım, dedim bəlkə bilirdin

Dedim bəlkə bilirdin çıxıb gedəcəyini

Bilə bilə etməzdin, eləməzdin bilirdim

·

Olsun, qismətdir deyək bu da bir yazı idi

"Kim uduzdu kim uddu" Məmməd Araz demişkən

Mənim də ruh halıma çox da güvənmək olmur

Bakı havası kimi saat saat dəyişkən

·

Bir musiqi çalınar ürəyimin telində

Səni də qınamıram mənim sonuncu payım

Bu yarımçıq, xəstəhal bu yolüstü taleyin

Bütün saatlarında başladı geri sayım...